Klippe.

etter å ha ordna og fiksa i vekesvis var det endelig klart for siste ledd i skuleoppgåva eg jobbar med(de får sjå seinare, lovar!). brukte formiddagen på å henge opp ekstra epler i treet i bakgården, før sju stk flinke folk pluss ein GRAA-kolleksjon skulle få plass i den vesle stova vår. då vi var ferdige skjedde alt så fort, kleda måtte leverast tilbake innan sju og alle hadde ein stad dei måtte vere. etter å ha vaska jord av baderomsgolvet og ete opp sjokoladerestane, pakka eg meg inn i dyna og lot vere å tenkje på eit par timar, før eg leita fram saksa og gjorde noko eg har tenkt på lenge, nemleg klippe håret! sjølv om det blei ujamnt og litt halvvegs så føler eg meg allereie betre, både på håret og stressmessig. i alle fall no, etter ei god natts søvn og verdas leeengste frukost.
–
–

Botanisk.

ein søndagstur i botanisk hage med det beste selskapet eg veit. vi såg lotusen blomstre og fikk helse på eit ekorn på veg heim. det er så mykje lettare å få noko ut av dagen når ein er to. 

Tre dagar.

fikk alt eg trengte heime i påska: vafler med brunost til frukost, ein tur på fjellet, lange morgonar under skråtak, bestastrikking, bilturar, mammakos og evige mengder påskesnop.

April.

i april var eg med på å dra fram ein heil masse lam, i april jobba eg alle dei raude dagane, i april planla eg interrailtur, i april fikk eg dei første fregnene, i april leverte eg opptaksprøvar til draumeskulen, i april las eg erlend loe og rare wikipedieartiklar, i april dansa eg meir enn før, i april var eg enda ikkje blitt frisk, i april begynte eg for alvor å glede meg til oslo-sommar,  i april kjøpte eg sykkel med korg, i april sat eg på balkongen og svetta, i april drakk eg altfor mykje kaffi, i april bestemte eg meg for å forandre ein heil del smågreier.

februar.

februar forsvann fullstendig mellom fingrane mine: eg hosta og hosta og hosta i tre veker i strekk, på flyet, på jobb, over vasken på badet heilt til eg brista eit ribbein, og eg burde vore hos legen for lenge sidan. eg reiste heim på besøk og gikk ein heil masse i skogen, fotograferte ca alle i familien, helste på sauene og fikk sjokolade og strikkepinnar som eg tok med tilbake til oslo.

ellers gikk eg ikkje på kino sånn som eg hadde lyst til og eg vatna ikkje plantane mine ofte nok, men eg drakk i alle fall litt raudvin, åt masse sjokolade og skaffa meg eit garderobeskap. eg vaska ikkje badet ein gong i veka heller, men eg jobba masse overtid, og eg sklei ikkje ein einaste gong på isen. eg gikk ned 3 kilo(skjønnar ikkje???) og mamma blei bekymra, eg bestemte meg en-de-lig for tatovering, eg skreiv ut den raude skriveboka mi, eg fylte tjue år og fikk frukost på senga, bursdagsallsong og ein heil masse drinkar og det må jo vere ein heilt ok måte å avslutte vinteren på.

for no er det straks vår, ikkje sant?

på veg.

10:20
eg blir pressa mot seteryggen då flyet lettar frå sogndal, det durar og bråkar og eg har latt vere å ta på meg headsetet for å unngå spørsmål frå flyvertinna. eg skrur jo aldri egentlig av telefonen uansett, eg har gløymt pinkoden, eller nei, eg har aldri hugsa den. utanfor det vesle vindauget er det snødekte fjell og brune marker og ein heil masse skog, bratte stup og morgonsol som kastar mjuke skuggar. konturar av spisse toppar mot den blå himmelen, ei og anna bygd med raudmalte gardstun og nærbutikk. å fly over vestlandet er det vakraste eg veit.

10:45
flyet svingar på veg inn mot landingsstripa og legger seg nesten heilt over på sida slik at sola skin rett inn vindauget og varmar ansiktet såvidt. eg har allereie bestemt at det er vår, sjølv om yr meinar det motsette. eg fjernar panna frå den kalde ruta då hjula møter rullebana og det bremsar hardt både i flyet og i kroppen. som alltid tek eg setebeltet av litt, berre litt, for tidlig, har sekken på golvet ved beina og ingenting i hylla over setene, er klar så fort eg får styr på ledninga til headsetet og slengt den blå boblejakka over skuldrane.

med ein gong eg stiger ut av flyet og står på sandanejord igjen, er eg tilbake i tredje media på firda, tilbake til skulekvardag, torsdagsfestar og ein trygghet i brystet eg aldri kjem til å gløyme.

januar.

tenker å begynne med ei ny greie: månadsoppsummering! entan i form av ei liste, bileter eller ein tekst av eit eller anna slag. trenger å skrive litt meir, og dette kan kanskje funke. 

i januar: jobba eg meg i hel, sendte eg hundre hei-eg-vil-gjerne-ha-garderobeskapet-som-du-gir-vekk-epostar til folk på finn, prøvde eg hardt å like frogner litt betre, kjøpte eg plantar og vekeplanlegger og svartkvittfilm, såg eg endeleg ferdig sesong tre av game of thrones, fotograferte eg altfor lite, begynte eg å tenke på neste år – og lagde ein plan b og c, var eg bakfull på jobb, hadde eg feber på jobb, smilte eg meir på jobb enn aleine heime, drakk eg masse gratis øl og sov på ein sofa og i ei seng som ikkje var mi, fikk eg jobb som produksjonsassistent, bestilte eg nesten tur til berlin, venezia, praha og så vidare, hengte eg opp tankekart på veggen over senga, innsåg eg at eg straks har levd i tjue lange år – og at sjølv om eg då er halvvegs til førti så er det heilt ok.

 

what happens now.

begynner året med å ikkje gå ut av døra på nesten tre dagar. bur i ein åtti-senga og ét ti klementinar om dagen, prøvar å lære å meditere(men sovnar), legger eit puslespel på tusen bitar av to menn på flåter i solnedgongen, lar vere å be om besøk på twitter for eg veit ingen svarar(og er seriøse), blar håpefult i gi bort-seksjonen på finn og prøvar å late som om det er litt meir koselig her enn det eigentlig er, er ensom men sover for mykje til å gjer noko med det, prøvar å oppdatere heimesida mi, men alt er så dårlig at det går ikkje an, jobbar frå 09-22 og griner nesten over middagen, gløymer å vatne plantane mine, gløymer å drikke opp vinen før eg sovnar, gløymer at det fins bra musikk, høyrer same songen igjen og igjen og igjen til den sit heilt fast, ser alle sesongane av bones berre fordi det er lettvint og det er ein sånn serie ein ikkje trenger følge med på for å skjønne kva som skjer, har evig vondt i nakken og blir så irr-i-tert fordi alt kostar pengar, inkludert ny overmadrass.

det er på tide å skjerpe seg ass.

 

paris, hausten 2012. 

lunka øl og solbrente kjakar.

 

malakoff 2013 i ein svartkvittfilm. så mange bra folk og så mykje fin musikk på éin plass. vi klinte drakk røykte hoppa dansa sang med lytta ropte sov gjennom litt for mange konsertar gav klemmar fikk klemmar lo fraus svetta pussa nesten ikkje tennene gløymte solkremen heime spelte kort venta venta venta fikk skyss smugla glasflasker var vakne når alle andre sov lengta etter toalett med vask sov trangt og klamt åt pølser wraps og masse ost og skinkebaguettar frå rema rota vekk blandevatn snylta på andre helste på folk sa hadet til folk og reiste heim med bussen halv tre på natta.

 

oslo.

første dagen i oslo: kjøper eit speil til 200 kr, lærer at dama som bur i nabohuset likar å sitte på balkongen å røyke, pakkar ut pakkar ut pakkar ut, sitter i parken og drikker gin and tonic, brukar for mykje pengar på kler, finner for første gong på eit halvt år ein butikk som sel favorittchipsen min, kopierar nøkkel, sovnar til lyden av ein dårlig konsert i bygget ved sidan av h si leilighet. andre dagen i oslo: lagar pasta carbonara i sola på kjøkenet, kjøper roser til 20 kr, oppdagar ein kjempestor godteributikk to trikkestopp unna, leitar etter skap og eintjue-seng på finn, lar vere å sjekke saldoen på kortet, pustar osloluft og tenker at livet definitivt kunne vore verre.