jul.

god jul alle! håpar de har fine, rolige dagar saman med familien og er varme på beina og mette i magen. eg har tatt fullstendig ferie frå både internett og skulearbeid og i det heile tatt resten av verda. det er så herlig. ser seriar i senga og spelar scabble og ét julekaker frå skapet og har ringenes herre-maraton. håpar eg aldri sluttar å elske jula.

reprise.

den klamme, kalde lufta i fjøsen. høy langs veggane og på fórbretta, musefeller i krokane. elskar å vere bondejente på våren. dei lange nettene på den blå sofaen med respirot i brystlomma og hendene trekt langt opp i dei skitne armane på dressen. mjuke ulldottar mot kjaken. blir varm i magen av desse biletene, dei hjelper på kulda og regnet. veit de kanskje har sett dei før, men håpar det går bra. køyr reprise!

korleis sy ein kjole.

dette er den første gjer det sjølv-posten her på bloggen!

tenkte eg skulle vise korleis ein ganske lett kan sy seg ein heilt enkel kjole – superkomfortabel og veldig allsidig. du trenger: symaskin, stoff(til denne typen kjole likar eg å bruke tynt bomullstoff. eg kjøper mitt her, hundre kroner for to meter ca. søk på «cotton tshirt fabric» for akkurat same type stoff som eg brukar her), tråd i same farge som stoffet, strikk som er 1-2 cm i breidda, strykejern, ein topp du likar passforma på og småting som knappenåler, blyant til å streke rundt stoffet med, saks og måleband. eventuelt ting å pynte kjolen med: naglar, blonder(fin butikk her), knappar og liknande. (alle bileta i innlegget kan sjåast større på flickr, berre trykk på dei.)

okei, steg éin: brett stoffet i to og finn fram ein heilt enkel topp du likar fasongen på, dette skal bli overdelen. brett òg toppen i to og legg den med bretten mot bretten på stoffet. sett i eit par knappenåler for å halde dei saman. etterpå strekar du rundt kanten på toppen, helst med ein blyant/kritt som er berekna på stoff, så får du det lett vekk etterpå. det skal bli sjåande ut som på biletet til høgre(dei svarte strekane er teikna på i photoshop, det raude krittet blei usynlig på bilder). la oss sei at dette er bakstykket. gjer akkurat det same ein gong til, berre at det no skal bli eit framstykke. pass på at stoffet ikkje flyttar på seg og klipp ca ein centimeter utanfor strekane, dette skal seinare brettast inn. klipp framstykket så nedringa du vil, sjølv likar eg at kanten er litt høgt oppe.

steg to: dette er for så vidt eit valfritt steg, men eg likar å gjer det slik fordi eg då kan tilpasse allting perfekt; pin saman fram- og bakstykket etter strekane og prøv toppen forsiktig på. det som er så fint med dette stoffet er at det har såpass mykje stretch at ein ikkje trenger glidelås og sånt styr. sett nåler der du må ta inn/forandre. hugs at ein liten centimeter av kanten skal brettast inn og syast. klipp og tilpass sånn at toppen passar akkurat slik du vil. sjå for deg at du skal sy på eit skjørt i midja òg, så toppen må vere i alle fall eit par-tre centimeter lenger enn det.

steg tre: finn fram strykejernet og stryk inn kanten i sida, i nakken og på brystet og fest med nåler. så: til symaskina! bruk enkeltsøm og sy ca ein halv centimeter frå kanten langs det nedbretta stoffet. pin etterpå fram- og bakstykket saman i eine sida(pass på å sy langs streken du teikna heilt i begynnelsen, eventuelt der du har merka av seinare) og sy dei saman. vi ventar med andre sida til skjørtet òg er sydd på.

steg fire: skjørtet! no skal vi bruke ein masse stoff for å få litt volum i skjørtet. finn fram strikket og mål det rundt midja for å finne ut kor mykje du trenger. eg likar at det er litt romslig, då kan eg heller fintilpasse det seinare. her har eg brukt eit strikk på ca 80 cm til å begynne med. spre stoffet utover golvet og teikn ein rett strek 5-10 cm frå kanten. pass på at stykket med stoff er både vidt og breiddt nok. fest strikket med ei nål eller to heilt i eine enden sånn at begynnelsen blir litt lettare. så til det som er pittelitt tricky; å sy på strikket. vi skal nemleg dra strikket mot oss mens vi syr det fast på stoffet. bruk ein vid sikksakksaum for å feste det litt betre enn med enkelsaum. det er greit å prøve seg fram med eit lite stykke stoff og strikk først, for å få det skikkelig til. sidan eg likar litt volum på skjørtet, dreg eg i strikken så mykje som mogeleg, men om du ikkje vil ha like mykje stoff i skjørtet treng du ikkje dra så hardt. det skal bli sjåande ut som på bileta nedanfor.

steg fem: no skal vi finne ut kor langt skjørtet skal vere. dette er òg heilt opp til deg, denne kjolen kan fungere som maxikjole òg, vil eg tru. bruk eit måleband og mål frå midja og så langt nedover som du vil ha det. eg likar mine mine kjolar ca femten centimeter over kneet. mål frå strikket og nedover skjørtet og merk av der du skal klippe. hugs å la det vere 1-2 cm ekstra stoff nederst slik at ein kan brette opp og sy ein kant. fest kanten med knappenåler og sy med enkeltsaum som før.

steg seks: snart ferdige! no skal berre toppen og skjørtet syast saman og kjolen lukkast i sida. merk av på vranga av toppen kvar skjørtet skal sitte fast, eg synes det er penast i midja, men igjen, du kan bestemme sjølv. fest toppen til skjørtet med knappenåler i strikket. hugs å ha innsida ut slik at vi får alle saumane inn på den ferdige kjolen. det er ikkje så nøye om toppen er litt smalare enn strikket på skjørtet, dette kan du klippe til. sy langs den øvste kanten på strikket. vreng så heile kjolen og pin saman sida som er open. sy langs heile sida. hugs òg å sy saman over skuldrane, om du enda ikkje har gjort det.

og voilá, du har ein ny kjole! klipp av småtrådar og overflødig stoff, rydd knappenålene opp frå golvet og finn fram ullstrømpebuksa, og du er good to go. (min kjole blei sjåande ca sånnher ut:)

om det var noko de ikkje skjønte eller eg gløymte å nemne, sei i frå! veit dette blei sjukt langt, men har av erfaring merka at det er betre å forklare for mykje enn for lite. og kva trur de, vil de ha meir sånther?

seks og ni.

haustsol på bakketoppen bak huset heime.

og klokka halv tre på natta i hagen utanfor hybelen. er ikkje sikker på om eg likar det, litt for uskarpt, litt for mykje rot.

hjelp.

merkar godt at denne bloggen ikkje er noko særleg for tida. vil så gjerne vere ukritisk og flink og skrive om spennande greier og vise fram sjukt fine bileter. vil gjer slik at de smilar sjølv om de sit midt i ein endelaus norsktime eller har blåfrosne fingrar og smelta snø i håret etter å ha vore ute i kulda. vil inspirere. eg veit at tohundre og førtiseks mennesker ikkje er all verda, men eg vil så gjerne at de skal like det de finn her inne.

så kva vil de ha? kva kan eg skrive om som gjer at de får lyst til å komme igjen? treng litt hjelp folkens, for ein blogg utan kommentarar og tilbakemeldingar er berre ei dagbok, og det kan ein like godt ha i ei låst skuff på soverommet.

minidiana i paris.

den andre dagen i paris kom vi over ein lomographybutikk og eg berre måtte måtte ha noko. det blei eit diana mini; lite, fint og plastikk, perfekt til å ha i lomma eller rundt halsen – og det var nettopp det eg hadde dei neste dagane. bomma litt på mange av biletene, men likte nokre i alle fall, og dei har jo uansett den herlege analoge kjensla! (biletet over saman med johanne sitt diana f+.)

three girls in paris.

haust i paris: litt vått men veldig pent.

dette er frå mandagen: ankom orly(flyplass) litt over halv tolv og fikk sjukt mykje ut av dagen. surra litt med å finne rett metro og sjekka inn på hostellet, smilte av den søte betjeninga før vi spaserte i montmartre og enda opp på ein liten pizzeria når alt anna var fullt og eller stengt. fikk krøllar i håret av regnet og hoppa innom ein heil del rare butikkar, som denne:

drog vidare til marais og la favorite! fin resturant med kjekke, om enn litt stressa, servitørar og sjukt god dessert(som det var for mørkt å ta bileter av).

etterpå gikk vi sjukt langt og utforska dei mørke gatene, kika inn glaset på fine butikkar og gikk oss pittelitt vill og måtte spørre etter vegen ganske mange gongar.

johanne var søt og filma såpeboblene som sveva over hustaka.

(fin og litt slitsom dag.)

veke fire: enden av september.

bilete nummer fire! dette er frå nest siste september i fjæra i heimbygda mi. det føles bra å fotografere for tida, berre synd eg ikkje har tid til å sortere og gjer noko med all inspirasjonen. heldigvis er det haustferie og i morgon tidleg reiser eg og julie og johanne til paris. PARIS!!! har gleda meg sidan mai. au revoir!

to the mountains.

på laurdag tok eg ei pause frå å vere sjuk og blei med mamma på fjelltur! der er sjukt fin utsikt over bygda og ein liten skog med høge tre og om ein går for langt ut på kanten kan ein ramle rett ned i fjæra(og det vil ein jo helst ikkje). fikk testa min nye 14mm litt meir og pusta kald bondelandetluft, fin laurdag.

tired minds.

om morgonen, autopilot: puttar alle bøkene i sekken, gløymer å fylle på vatnflaska, snur i døra for å hente paraplyen. støttar hovudet i hendene i norsktimane og må bite meg sjølv i leppa for å ikkje sovne.

om kvelden: sit med lekser til klokketårnet utanfor vindauget sler tolv og eitt og halv to og dusjar lenge før eg sloknar med vått hår. kvardagen er slitsom og eg taklar det ikkje så bra som eg burde.

(hostar til eg får gangsperre i magen, drikk te halve natta og misbrukar nasespray og andre farlige greier. haustforkjølelse på sitt verste, snurrar skjerfet hardt rundt halsen og pustar minimalt i den kalde lufta.)

(frå min andre svartkvittfilm. fremkalte den klokka ett på natta og sølte kjemikaliar over heile kjøkenet.)